Ovdasiidu » Oadjoriekti – spesiáladuopmostuollu

Oadjoriekti – spesiáladuopmostuollu

Oadjorievtti doaimma ákkaid birra lea mearriduvvon oadjoriektelágas. Oadjorievtti láhkageavahandoaimmas heivehuvvo hálddahusláhkageavahanláhka. Oadjorievttis sáhttá doaimmahit áššiidis suoma- ja ruoŧagillii. Dasa lassin sáhttá geavahit sámegiela giellalágas mearriduvvon ákkaiguin.

Oadjorievtti vuollásaš áššit

Oadjorievtti vuollásaš áššit gusket earret eará olbmo vuoigatvuhtii bargoealáhahkii, álbmotealáhahkii, bargguhisvuođaovdui, bálkádorvui, ássandoarjagii, oahppadoarjagii, Álbmotealáhatlágádusa máksin váttolašvuođaovdduide, buohcooadjolágas daddjojuvvon ovdduide, veajuiduhttimii sihke vuoigatvuhtii buhtadussii bargobártti, ámmátdávdda, rihkusvahága, soalddátváttu dahje soalddátbártti vuođul.

Oadjoriekti lea áidna duopmostuollu, mas sáhttá ohcat nuppástusa buot ovdalis máinnašuvvon áššiin. Oadjorievtti doaibmaváldái eai goittotge gula biilaoadjo-, ruovttuoadjo- dahje eará priváhtaoadjoáššiid gieđahallan.

Áigáiboahtodorvoáššiid nuppástusohcanvuogádat

Nuppástusohcanvuogádagas áigáiboahtodorvoáššiin leat vuosttažettiin guokte muttu. Ovdduid mieđiheaddji lágádusaid ja ovttastumiid addin mearrádusaide ohccojuvvo dábálaččat nuppástus guoskevaš áššiid gieđahalli nuppástusohcanlávdegottis. Nuppástusohcanlávdegottiid addin mearrádusaide ohccojuvvo nuppástus Oadjorievttis, mii lea alimus nuppástusohcanorgána. Dan mearrádusaide ii sáhte ohcat nuppástusa váidimiin. Dihto bárteáššiin sáhttá goittotge ohcat váidinlobi Alimus rievttis.

Dasa lassin Oadjoriekti sáhttá, go lágas oaivvilduvvon eavttut leat devdojuvvon, jávkadit iežas addin lágafámolaš mearrádusa dahje nuppástusohcanlávdegotti addin lágafámolaš mearrádusa.

Oadjorievtti čoakkádus

Oadjorievtti doaimma jođiha njunušduopmár. Earret eará hálddahus- ja nammadanáššiid válmmaštallamis njunušduopmáris lea veahkkin njunušjoavku, masa gullet njunušduopmára lassin ossodagaid ovdaolbmot dahjege lágamánnit sihke hálddahus- ja doaimmahatbálvalusovttadga ovdaolmmožin doaibmi kansliijahoavda.

Oadjoriekti lea juohkásan golbman ossodahkan. Ossodagas 1 gieđahallojit vuosttažettiin bárteoadjo-, rihkusvahát-, oahppadoarjja- ja soalddátváddoáššit. Ossodagas 2 gieđahallojit vuosttažettiin priváhta bálvalangaskavuođaide vuođđuduvvi ealáhatáššit sihke álbmotealáhat- ja ássandoarjjaáššit. Ossodagas 3 gieđahallojit vuosttažettiin stáhta ja gielddaid bálvalangaskavuođaide vuođđuduvvi ealáhatáššit sihke bargguhisvuođadorvo-, váttolašvuođaovdo- ja buohcooadjoáššit.

Áššiid čoavdimii oassálasti lahtut

Ášši leat čoavdimin golbma dahje vihtta lahtu dan mielde, makkár áššejoavkkus ja -šlájas goas lea jearaldat. Áššiid čoavdimii oassálasti buot lahtut doibmet doaimmasteaset duopmára vásttuin ja sii leat vurdnon duopmárváli dahje addán duopmárdáhkideami.

Áššit čovdojuvvojit áššemeannudeaddji ovdanbuktima vuođul. Juridihkalaš áššiin ášši leat čoavdimin sátnejođiheaddji lassin guokte juristalahtu, main nubbi lea oadjoriekteduopmár ja nubbi áššemeannudeaddji. Jos medisiinnalaš čielggadus sáhttá váikkuhit ášši čoavdimii, de áššemeannudeaddji sajis ášši lea čoavidmin doavtterlahttu, guhte lea oasseáigásaš virgegaskavuođas Oadjoriektái. Bargoealáhat-, bárteoadjo-, bargguhisvuođadorvo-, bálkádorvo- ja soalddátváddoáššiid leat čoavdimin dasa lassin guokte siidodoaibmasaš áššedovdilahtu, geaid stáhtaráđđi lea mearridan dán doibmii.

 
Julkaistu 22.10.2013