Ovdasiidu » Oadjoriekti – spesiáladuopmostuollu » Áššiid gieđahallan Oadjorievttis

Áššiid gieđahallan Oadjorievttis

Váidaga dahkan

Váiddavuloš mearrádussii lea laktojuvvon váidinčujuhus, mas bohtet ovdan váidaga dahkamii guoskevaš mávssoleamos áššit. Váiddareive doaimmahuvvo dábálaččat ovdduoažžunlágádussii. Jos ovdduoažžunlágádus ii njulge mearrádusa nuppástusohcci gáibádusa mielde, de dat doaimmaha váiddareivve oktan čuvvosiiguin ja buot earáge áššái guoskevaš áššegirjjiid Oadjoriektái.

Ášši gieđahallanmuttut

Ášši merkejuvvo boahtán gieđahallamii Oadjorievtti registrenkantuvrras. Dasto notára dahká ášši ovdaválmmaštallama. Válmmaštallon áššit juhkkojuvvojit áššemeannudeaddjái vuosttažettiin dan ortnega mielde, go áššit leat boahtán gieđahallamii. Áššemeannudeaddji dahká áššegirjemateriála vuođul áššemeannudanmuittuhačállaga ja mearrádusárvalusa. Rievtti lahtut oahpásmuvvet dasto áššái guhtege vuorustis. Go rievtti sátnejođiheaddji mielas ášši lea čoavdimis, de son mearrida ahte dat galgá gieđahallot ja čovdojuvvot rievtti lahtuid čoahkimis.

Njunušduopmár ja lágamánnit iežaset ossodagain gozihit vuoigatvuođaprinsihpaid heiveheami ja láhkadulkoma ovttaláganvuođa. Prinsihpa dáfus mearkkašahtti ášši sáhttá dárbbu mielde sirdojuvvot čoavdinláhkai nannejuvvon čoahkkimis dahje dievasčoahkkimis.

Oadjorievtti mearrádus

Oadjoriekti addá áššis čálalaš mearrádusa, mii doaimmahuvvo áššáiosolažžii. Jos áššáiosolaš geavaha juristta, de mearrádus doaimmahuvvo vuosttažettiin dušše áššealbmái. Oadjorievtti mearrádusa sisdoalus eai addojuvvo dieđut ovdalgo mearrádusáššegirjjit leat postejuvvon. Mearrádusáššegirjjit postejuvvojit dábálaččat mánotbaji sisa ášši čoavdimis.

Ášši gieđahallan Oadjorievttis nohká mearrádusa postemii. Dan ovdal Oadjorievtti mearrádusa sisdoalus eai addojuvvo dieđut. Go áššáiošolaš ealáhátlágádus, oadjosearvi dahje eará lágádus leat ožžon Oadjorievtti mearrádusa, de dat galget álgit mearrádusa dihte vejolaš doaibmabijuide.

Njálmmálaš gieđahallan

Riektegeavvan Oadjorievttis dáhpáhuvvá vuosttažettiin čálalaš hámis. Oadjoriekti sáhttá goittot doaimmahit njálmmálaš gieđahallama juogo nuppástusohcci bivdaga vuođul dahje ášši čielggadan dihte maiddái iežas álgaga vuođul.

Jos nuppástusohcci mielas Oadjoriekti galgá doaimmahit áššis njálmmálaš gieđahallama, de son galgá ovdanbuktit dása guoskevaš bivdaga čálalaččat. Seammás nuppástusohcci galgá almmuhit, manin njálmmálaš gieđahallamii lea dárbu ja mii dán gieđahallamis galggašii čielggaduvvot.

Njálmmálaš gieđahallamis sáhttá gullat nuppástusohcci, vuostebeallin leahkki ovttastumi dahje lágádusa, duođašteaddjiid ja áššedovdiid sihke vuostáiváldit eará čielggadusa. Oadjorievtti doavtterlahttu ii daga nuppástusohccái doavtterdárkkisteami njálmmálaš gieđahallama oktavuođas iige mange earáge dilis.

 
Julkaistu 15.10.2013